خطیب العصر کی کچھ یادیں

تحریر ناگفتنی / مولانا محمد اسماعیل ریحان

​

خطیب العصر حضرت مولاناسید عبدالمجیدندیم شاہ صاحب جو اسلام کی دعوت اورپیام توحید کی اشاعت کے لیے جوانی  

  سے بڑھاپے تک ملکوں ملکوں کے سفر پر رہے، تین دسمبر کی صبح اس سفر پر روانہ ہوگئے، جہاں سے کوئی واپس نہیں آتا۔ ان کے جانے سے خطابت کاچمن اجڑگیا۔ اس یادگار عہد کا خاتمہ ہوگیا جس کاباب امیر شریعت حضرت عطاء اللہ شاہ بخاری نے وا کیاتھا۔ حضرت خطیب العصرکراچی اکثر تشریف لاتے تھے۔ ہم ان عشاق میں سے تھے جواپنے ماہِ تمام کو دور ہی سے تکتے تھے۔ ایک بار حضرت تشریف لائے (یہ 1985ء کی بات ہے)شاہ صاحب کا لسبیلہ میں قیام تھا۔ میں، ماموں رمضان اور بڑے بھائی حکیم عبدالرحمن ہمت کرکے وہاں پہنچ گئے، مگر دروازے پر عشاق کاپہلے سے ہجوم تھا۔ اس بھیڑمیں اضافے سے حضرت کوتکلیف ہی ہوتی۔ اس لیے ہم واپس ہوگئے۔

ملاقات کی حسرت بہرحال باقی رہی۔ بیس سال گزرگئے۔ اس سال 17مئی کو اللہ نے یہ موقع عطافرمادیا۔ اسامہ مسجد، چوہڑ چوک راولپنڈی کے امام اور بانیٔ مدرسہ حضرت مولاناظہیرالدین امازئی صاحب کے لیے آج تک دل سے دعائیں نکل رہی ہیں کہ جن کے ذریعے یہ سعادت حاصل ہوئی۔

حضرت شاہ صاحب وہاں بیان کے لیے تشریف لائے تھے۔ الحمد للہ اس سے قبل تقریباً ایک گھنٹے تک مسجد سے ملحق کمرے میںحضرت سے ملاقات اوربات چیت کاموقع ملا۔ حضرت نے بہت ہی محبت و شفقت کا معاملہ فرمایا۔ میںنے ہمیشہ انہیں اسٹیج پر ہی دیکھا تھا، اس لیے قدرتی طورپران کا ایک رعب طاری تھا، مگر ان کے محبت بھر ے جملوں نے تھوڑی ہی دیر میں ایسامانوس کرلیا کہ میں بلاتکلف وہ سوالات پوچھنے لگا جو ایک مدت سے ذہن میں تھے۔ 

مجھے یاد ہے کہ لڑکپن میں جانباز مرزا کی ’’حیاتِ امیرِ شریعت ‘‘ پڑھ کر میں حضرت شاہ جی رحمہ اللہ کی تقریریں تلاش کرنے کی تگ ودومیں لگ گیاتھا، مگر سالہاسال کی کوشش کے باوجود، صرف چند منٹ کی ایک ریکارڈنگ مل سکی۔ تب میں نے محلے کی بزرگ شخصیت قاری دین محمدصاحب سے پوچھا تھا کہ حضرت عطاء اللہ شاہ بخاری جیسی تقریرکوئی اوربھی کرتاہے۔ وہ جوکہ شاہ جی کی تقاریرسنے ہوئے تھے، فرمانے لگیـــ:’’ہاں علامہ عبدالمجید ندیم میں انہی کارنگ ہے۔ ‘‘ 

یہ سوال اس دن میں نے خود حضرت شاہ صاحب سے کرلیا۔ حضرت فرمانے لگے: ’’اس میں توشک نہیں کہ میں حضرت شاہ جی رحمہ اللہ کی شخصیت اوران کے اندازِخطابت سے بہت متاثر تھا، ان کی دعائیں بھی مجھے ملیں۔ اس لیے کچھ نہ کچھ اثر ضرور ہے، مگر ان کاہوبہو انداز کوئی نہیں اپناسکا۔ شاید اللہ کی طرف سے ایک تکوینی حکمت تھی کہ ان کاعہد انہی پر ختم ہوجائے، اس لیے ان کی کوئی مکمل تقریر بھی محفوظ نہیں ہوئی۔ ‘‘ 
حضرت شاہ صاحب نے اس ملاقات میں دینی محاذوںپر کام کرنے والوں کے لیے تشدد، خودرائی اوراکابر سے بے اعتنائی کو سخت مضرقراردیا۔ بڑوں پر اعتماد کرنے، ان کے مشوروں کے مطابق چلنے کی ضرورت پر زور دیا۔ 

اس دن میں نے شاہ صاحب سے یہ درخواست بھی کی کہ اپنے کچھ حالات ِ زندگی قلم بند کرادیں، کیونکہ حضرت کی ولادت، خاندانی پس منظر، بچپن، تعلیم اورنوجوانی کے بارے میں مجھے ڈھونڈے سے بھی کچھ نہیں ملاتھا۔ میری اس درخواست کے جوا ب میںحضر ت نے حکیمانہ انداز میں فرمایا ـ: ’’ یہ نشست اس طویل موضوع کے لیے کافی نہیں ہوگی۔ بہت سی باتیں ہیں، تشنہ رہ جائیں گی۔ ‘‘ 

پھر حضرت نے اپنے خادم بھائی انجم صاحب سے رابطہ رکھنے کاکہا۔ بھائی انجم سے وہیں مل گئے۔ وہ حضرت شاہ صاحب کی تقاریر کو تحریر ی شکل میں لانے کاکام کررہے ہیں۔ اس کے علاوہ انہوںنے بتایاکہ وہ شاہ صاحب کے حالات ِ زندگی بھی جمع کررہے ہیں۔ اللہ کرے یہ کاوش جلد منظر عام پرآجائے تاکہ شاہ صاحب کے علوم وفیوض کی ہر سطح پر مزید بر مزید اشاعت ہو۔ اُس دن اسامہ مسجد میں حضرت کے صاحبزادے مفتی فیصل ندیم صاحب سے بھی ملاقات ہوئی، جو اپنے والدگرامی کے جانشین ہیں۔ وہ جس اخلاق کے ساتھ پیش آئے، اسے میں کبھی نہیں بھول سکتا۔ اتنی بڑی شخصیت سے نسبی وابستگی کے ساتھ ساتھ طبیعت میں نرمی، انکساری اورمروت بلاشبہ حضرت شاہ صاحب کے حسنِ تربیت کاعکس تھا۔ حضرت شاہ صاحب رحمہ اللہ کی وفات پر تعزیت کے لیے 5؍ دسمبر کو حمزہ مسجد راول پنڈی حاضری ہوئی (حضرت شاہ صاحب پہلے ملتان میں رہائش پذیر تھے۔ 2001ء میں راول پنڈی منتقل ہوئے، یوں14برس انہوںنے یہاں گزارے )حمزہ مسجد کے مہمان خانے میںمفتی فیصل ندیم صاحب اوران کے برادران سید عارف ندیم اورسید فاروق ندیم سے بھی ملاقات ہوئی۔ (حضرت کے پانچ صاحبزادے ہیں سب سے بڑے سید عبدالباسط ہیں۔ ایک صاحبزادے سید طاہر ندیم 2000ء میں شہید ہوگئے تھے۔ ) تعزیت کرنے والے ملک کے کونے کونے سے آرہے تھے اورشاہ صاحب کی رحلت پر دلی رنج وغم کے اظہار کے ساتھ دعائے مغفرت و رحمت کر رہے تھے۔ 

مجھے پہلے بھی باربارخیال آتا تھااورشاہ صاحب کی رحلت کے بعدزیادہ شدت سے آرہاہے کہ جس طرح اکابر کی کتب، مدارس وجامعات کی لائبریریوں میں محفوظ ہیں اسی طرح اکابر کی تقاریروبیانات کی بھی ایک مرکزی لائبریر ی ہونی چاہیے۔ راقم اسکول کے زمانے ہی سے علمائے کرام کی تقریروں کی کیسٹیں جمع کر نے کاشوقین تھا۔ لسبیلہ کے اسلامی ریکارڈنگ سینٹر اورصدر کے پاک ریکارڈنگ سینٹر کے چکر اکثر لگتے رہتے تھے۔ ایک اچھا خاصاذخیرہ جمع کرلیاتھا جس میں سے کچھ گردشِ حالات کی نذر ہوگیااورکچھ اب بھی باقی ہے۔ کیسٹوں سے سی ڈیز کازمانہ آیا، تومیں تقاریر ِ علماء کی سی ڈیز جمع کرنے لگا۔ پھر انٹر نیٹ سے بھی بیانات ڈاؤن لوڈ کرنے کاسلسلہ بھی رہا۔ اب بھی ایک ہارڈ ڈسک میںتقاریر وبیانات کاخاصاذخیرہ جمع ہے، مگر درحقیقت یہ دریاکاایک قطرہ ہے۔ 

حضرت خطیب العصر رحمہ اللہ میرے پسندیدہ مقررتھے، اس لیے چندسال پہلے مجھے خیال آیاکہ حضرت کے تمام بیانات جمع کیے جائیں۔ سب سے زیادہ تلاش مجھے اس تقریر کی تھی جو اپریل 1981ء کے جلسے میں روبرو سنی تھی، مگر کسی جگہ بھی وہ نہ مل سکی۔ اسی سلسلے میںبڑی مدت بعد پاک ریکارڈنگ سینٹرجاناہوا۔ وہاں کے یوسف بھائی نے مجھے پہچان لیا۔ میں نے کہا :’’مجھے مولانا عبد المجیدندیم صاحب کی اپریل 1981ء والی تقریرچاہیے۔ ‘‘ 

یوسف بھائی نے پوچھا: ’’موضوع ؟‘‘ میں نے کہا:’’خلفائے راشدین ‘‘ یوسف بھائی کاحافظہ بہت اچھاہے، کہنے لگے :’’ایسی ایک پرانی تقریر ہے توسہی، مگر لوگ اسے طلب نہیں کرتے اس لیے اس کی کاپیاں بناکرنہیں رکھی ہیں۔ آپ کچھ دنوں بعد آجائیں۔ مجھے اسٹورمیں اس کی ماسٹرکاپی تلاش کرنا پڑے گی۔ اگرمل گئی توکاپی کردوں گا۔ ‘‘ 

میںنے کچھ دنوں بعد فون پر رابطہ کیااورپھر پاک ریکارڈنگ سینٹر پہنچ گیا۔ یوسف بھائی نے تقریر ڈھونڈ نکالی تھی۔ وہ خود بھی شاہ صاحب کی تقریروں کے رسیا تھے۔ مجھے دیکھ کرکہنے لگے :’’شاہ صاحب کی یہ تقریر بہت ہی زبردست ہے۔ آپ واقعی باذوق ہیں کہ ایسی تقریر تلاش کروائی۔ ‘‘ 

پھرانہوںنے کیسٹ کاپی کرکے دے دی اور میں یہ خزانہ لیے نہایت شاداں و فرحاں گھر لوٹا۔ گھر میں والدین، بھائیوں اور بچوں کو بٹھاکر جب یہ کیسٹ چلائی تو ایسالگا جیسے کھوئی ہوئی بہار دوبارہ آگئی ہو۔ 

کیسٹوں کی دکانوں میں عام طورپر کسی بڑے سے بڑے مشہور خطیب کی بھی پچاس ساٹھ کیسٹس لگی ہوتی ہیں، کیونکہ پرانی کیسٹیں عام طورپر لوگ نہیں مانگتے۔ ماسٹر کاپیاں کچھ مدت تک اسٹورمیں رہتی ہیں اور پھر مرورِ زمانہ کی نذر ہوجاتی ہیں۔ آج آپ حضرت مفتی محمود یاحضرت مولاناعبدالشکور دین پوری کی تقاریر جمع کرناچاہیں تو بہت سی دکانوں کاچکر لگاکربھی شاید پندرہ بیس کیسٹیں ہاتھ آئیں گی، حالانکہ پچیس تیس سال پہلے ہر دکان پر ان کی درجنوں تقاریر گاہکوں کے لیے تیار ہوتی تھیں، مگر آج وہ کیسٹیں کہاں گئیں۔ حضرت مولانا عبدالمجید ندیم صاحب نے اپنی 75 سالہ زندگی میں سے کم وبیش 55 سال دین کی تبلیغ میں گزارے۔ اس زمانے میں بہت کم دن ایسے ہوں گے جن میں انہوںنے کہیں تقریر نہ کی ہو۔ بلامبالغہ ان کے بیانات کی تعداد ہزاروں میں ہے جن میں سے کئی سو یقینا ریکارڈ کرکے مارکیٹ میں فروخت کیے گئے ہیں، مگرہمیں کسی بڑے سے بڑے کیسٹ گھر یا سی ڈیز کی دکان میںان کی ساٹھ، سترسے زائد تقاریر نہیں مل پاتیں۔ آخر وہ ذخیرہ کہاں گیا۔ میں کئی سالوں سے بعض علماء کی کچھ تقاریر تلاش کررہاہوں، وہ کسی دکان میں ہیں نہ انٹرنیٹ پر۔ ایسے میں نہایت ضروری ہے کہ کوئی بندہ ٔ خدا اِ س کام کے لیے اٹھے۔ یہ کیسٹیں جو منظر عام سے غائب ہیں، آج کسی نہ کسی گھر میں کسی الماری یاصندوق میں مقفل ہوں گی، مگر شاید دس بیس سال بعد ان کابیشتر حصہ تلف ہوچکاہو۔ جیساکہ خو د میرے ذخیرے سے بہت کچھ گم ہوچکاہے۔ یہ کرنے کاکام ہے، کوئی ادارہ ایسی ’’صوتی لائبریری ‘‘ بنا ئے اورپھر اسے آن لائن کردے۔ ہمار ے اکابر کاعظیم علمی ورثہ محفوظ ہوجائے گا اور کرنے والے صدقۂ جاریہ کااجرِ عظیم پاتارہے گا۔http://www.zarbemomin.com.pk/index.php/molana-muahmmad-ismail-rehan/794-khateeb-al-asar-ki-kuch-yadeen